Понедельник, 22.07.2019
Хойнікшчына
Меню сайта
Статистика

Онлайн всего: 1
Гостей: 1
Пользователей: 0

Паселішчы нашага рэгіёна ў дакументах XVI  XVII стст.

     Акты, относящиеся к истории Западной России. Т. 1(6). Сборник документов канцелярии великого князя литовского Александ ра Ягеллончика, 1494 – 1506 гг. Шестая книга записей Литовской метрики / сост., коммент., вспом. указ.: М. Е. Бычкова (отв. сост.), О. И. Хоруженко, А. В. Виноградов; отв. ред. тома С. М. Каштанов ; Рос. Акад. наук, Ин-т рос. истории. – М.; СПб.: Нестор-История, 2012. – 664 с. 

*******

     LIETUVOS METRIKA. Knyga Nr. 9 (1511–1518). Užrašymų knyga 9 / Metryka Litewska. Księga Nr 9 / 9 księga wpisów / Księga-kontynuacja (1508–1518). Wydał K. Pietkiewicz (Uniwersytet im. Adama Mickiewicza w Poznaniu). Vilnius: Žara, 2002 [2004]. P. 240 – 241.
     Вильнюс, 1514. 12. 26
    Во имя живоначалныя, нерозделныя Троица, амин. Каждая реч света того подлуг чоловеченства ведома есть, ку сталости которая ж николи есть [235 адв.] въпевнена и в памети тримана, але часом забытю отдает ся и с памети выходит, нижли наидено вчоными, слушными и справедливыми речи выписаню отдати ку увереню и досветченю на пришлыи час напотом сталых речеи, прото, мы, Жикгимонт, Божю милостью корол полскии, велики князь литовскии, рускии, княжа пруское, жомоитскии и иных пан и дедич, чиним знаменито сим нашим листом, хто на него посмотрит або чтучи его вслышит, нынешним и напотом будучим, кому будет потреб того ведати.
   Бил нам чолом князь Михаило Василевич Збаражскии о том, што перво сего дали есмо ему волостку нашу Брягин держати до его живота, и тыми разы бил нам чолом, абыхмо то ему потвердили нашим привилем на  вечность.
    Ино мы, вбачивши верную и справедливую, знаменитее накладную его службу з давных лет ку отцу нашому, славное памети Казимиру, и брату нашому Александру, королем их милости, и к нам, иж он з особливых цнот своих не был вмешкан служоб наших и земских напротивку неприетелеи наших всякою поволностю, накладом, статком своим, не лютуючи горла своего охотне то нам заслуговал, мы теж маючи възгляд о заплате праци его  и хотячи напотом охотнеишого и пилнейшого его вчинити к нам, яко к пану дедичному, з ласки нашое, на причину Панов Рад нашихъ и на его чоломбите то вчинили: тую волостку Брягин з местом и с корчмами, и з мытом, и з городищом, и со всими селы, и з людми, кром тых сел, што первеи того кому у тои волости будем дали, и з землями пашными и бортными, и з сеножатми, и з лесы, и з дубровами, и съ хмелники, и з боры, и з ловы звериными и пташими, и з езы, и з реками, и з речками, и з бобровыми гоны, и с озеры, и съ ставы, и съ ставищи, и з млыны, и з их вымелки, и з данми грошовыми и медовыми и куничными, и с тивунщиною, и со всим правом и панством, так долго и широко, как тая волостка, которую ж он держал, Брягин, з давных часов в собе ся мела и ныне мает, потвержаем сим нашим привилием вечно [236 (202)] и навеки непорушно ему (С. 240) самому и  его жоне, и их детем и напотом будучимъ их счадком. Волен то он и его справедливыи наследки прибавити, розширити и замок собе справити, и место осадити и къ своему вжиточному обернути и лепшому обернути, как сам налепеи розумеючи.
    А на твердость того и печат нашу казали есмо привесити к сему нашому листу.
    При том были велеможнии и шляхотне врожоныи Панове Рада нашь: воевода виленскии, канцлер, пан Миколаи Миколаевич Радивиловича; пан виленскии, гетман, староста луцкии, маршалок Волынское земли, князь Констентин Иванович Острозскии; воевода троцкии, маршалок дворныи, пан Григореи Станиславович Остиковича; пан троцкии, староста жомоитскии, пан Станислав; маршалок земскии, державца слонимскии, пан Ян Миколаевич; воевода полоцкии, державца мозырскии, пан Ольбрахт Мартинович Кгаштовтовича; староста городенскии, подчашии, пан Юрии Миколаевич; воевода новгородскии, староста дорогицкии, пан Ян Янович Заберезинскии и иныи Панове Рада наша.
    Писан у Вильни, лета Божего тисяча пятсот [14] году, месеца декабря ка [21] ден, индикт г [3]. (C. 241) 

*******

    Публікацыя: Андрій Блануца. Земельні надання  Сигізмунда І Старого на Українські землі Великого Князівства Литовського // Україна в Центрально-Східній Европі. 2008. № 8. С. 69 – 70 (арыгінал: Російський державний архів давніх актів. Ф. 389 (Литовська метрика). Оп. 1. Од. зб. 17. Арк. 251 зв. – 252)

    Лист писаныи князю Дмитру Романовичу Виденицкому до пана воеводы киевского абы именя розные по Семену Полозовичу зосталые ему яко зятю его поступилъ
    Жикгимонт Божю милостю корол
    Воеводе киевъскому, державцы свислоцкому пану Андрею Якубовичу Немировича. Жаловалъ нам дворянинъ нашъ княз Дмитреи Романовичъ Виденецкии о томъ, што жъ которые именя мелъ державца речицкии тесть его, небожчикъ панъ Семенъ Полозовичъ наимя Ухобное, Углядковичи, Белыи Берегъ, Виточов, Мартиновичи, Хвоиники, Остроглядовичи, Новоселки а двор с пустовщинами у замку Киеве и на месте, и во Вручомъ. И тые деи онъ вси именя свои держалъ за даниною и листы отца нашого Казимера, короля, и брата нашого Александра, королеи ихъ милости и нашими, то пакъ деи твоя милост по животе его тыи вси именя къ своимъ рукамъ побралъ безвинне и ему, зятю его, поступити ихъ не хочешъ. А онъ як отца нашого Казимера, короля, такъ тежъ и брата нашого Александра, короля его милости, и наши листы твердости на вси тые именя в себе маеть и очъкольве бы онъ и тых твердостеи на то в себе не малъ, а одинакъ же бы не малъ без воли нашои тых именеи к своимъ рукамъ брати. Для чого жъ мы послали дворянина нашого Ивана Васильевича Выштравъку и приказуемъ тобе, ажо бы еси тых именеи со всимъ с тымъ князю Дмитру поступилъ, съ чим будешъ побралъ перед тымъ дворяниномъ нашимъ конечъно, пакъ ли же бы еси не дбаючи о тое росказанье нашое, тыхъ всихъ именеи ему ся поступити не хотелъ. Мы казали тому жъ дворянину нашому во вси тыи именя князя Дмитра моцъно увязати. А кгды дасть Богъ у паньстве нашом, великом князстве литовъскомъ, будемъ, окажемъ к сему на тые именя листы твердости перед собою положити, онъ ихъ мает тогды перед нами положити…
    ​П(и)сан y Кракове под лет(а) Бож(е)(г)(о) нарож(е)(н)(я) 1000 пят|сот 32 м(е)с(я)ца марта 3 ден, инъдикт 5
    Михаило писаръ

*******

*******

Архив Юго-Западной России. Ч. 7. Т. І. Акты о заселении Юго-Западной России. Киев, 1886.
Описание Мозырского замка 1552 года. С. 636 – 637, 644

*******

Архив Юго-Западной России. Ч. 8. Т. V. Акты об украинской администрации XVI XVII вв. Киев, 1907.
 Ревизия Мозырского староства 1560 года. С. 480 – 481

*******

Архив Юго-Западной России. Ч. VIII. Т. VI.

Акты о землевладении в Юго-Западной России XVI – XVIII  вв.

Киев, 1911. С. 224 – 227

*******

Архив Юго-Западной России. Ч. VII. Т. I. Акты о заселении Юго-Западной России. Киев, 1886.. С. 222 – 225

*******

Загаловак дакумента, урывак з якога змешчаны ніжэй, украінскія выдаўцы памылкова датавалі стагоддзем раней, чым ёсць на самой справе. Хоць у ім і выкарыстаны матэрыял рэвізіі 1560 або 1561 г., але сам тэкст мусім датаваць 1658 годам. Як бачым з папярэдняга польска- і наступнага лацінамоўнага дакументаў, уладальнікі Вадовічаў Казімір Аляксандр і Рыгор Круневічы (тут названыя Курневічамі) згаданыя ў 1637, 1658 і 1671 г.; відавочна, у 1558 г. ні адзін з іх жыць ці хоць бы быць паўналетнім  не мог.

*******

Metryka Litewska, Księga wpisów Nr. 131. Opracował Andrzej Rachuba. Warszawa, 2001. S. 157 – 158, 234

Падрыхтаваў С. Бельскі

Вход на сайт
Поиск
Календарь
«  Июль 2019  »
ПнВтСрЧтПтСбВс
1234567
891011121314
15161718192021
22232425262728
293031
Друзья сайта
  • Официальный блог
  • Сообщество uCoz
  • FAQ по системе
  • Инструкции для uCoz
  • Copyright MyCorp © 2019