Пятница, 29.03.2024
Хойнікшчына
Меню сайта
Статистика

Онлайн всего: 1
Гостей: 1
Пользователей: 0

1603 р., грудня 20. Київ. – Випис з гродських книг Київського воєводства листа-примирення від 10 листопада 1603 р. між Миколою Харлинським та ігуменом Свято-Михайлівського Золотоверхого монастиря Йосифом Мировським про розмежування лисковських та красносільських земель
// (арк. 460) “Выпис с книг кгродских воеводства Киевского.
Лета от нарожения Сна Бжго тисеча шестсот третего, мсца декабра двадцатого дня.
На рочках судовых кгродских киевских, которые от дня десятого, мсца декабра, в сем року тисеча шестсот третем, припали и судовне отправовитесе зачали, перед нами, Вацславом Вилгорским, подвоеводим, а Филоном Стрыбылем, чашником его кр. млсти и судею, врадниками судовимы кгродскыми киевскими, станувши обличне у суду его млст пан Миколай Харлинский, сам устне и доброволне ку записаню до книг кгродских киевских при очевистом сознаню своим подал лист запис на розделене кгрунтов и всих пожитков в добрах, нижей в записе помененых, в Бозе велебному его млсти отцу Иосафу Мировскому, игумену, и всей капитуле манастыра светого Михайла Золотоверхого киевского служачи, под печатю и с подписом руки своее, также под печатми и с подписом рук людей зацных, еднако ж на той справе будучих справленый, которого сознанем своим ствердивши, просил, абы был принят и до книг кгродских киевских уписан. Которого мы огледавши и читаного вислухавши, ку уписаню до книг приняли и слово от слова так се в собе мает: “Я Миколай Щаснович Харлинский, оз // (арк. 460) наймую сим листом моим, кому бы того видати належало, иж што которые розницы и споры от часу немалого бывали в кгрунтех и лузех сполных села нашого Красноселского, а именя их млсти велебного в Бзе отца Иоасафа Мировского, игумена, и всее еже о Христе братии капитулы манастыра Михайловского Золотоверхого киевского села Лысковского, с которых то розниц приходило до частых заторжек, грабежов и розных кривд. А то для непорядного розделеня а суместного уживаня тых половиц на обе стороне служачих, лугу и пожитков, в них будучих, зачим межи нами позвы и процесы правние уростат мусели. Тогды мы, прихиляючисе до згоды, абы вже болш межи поддаными нашими сваров и ростырков не было, за зложенем собе часу и року певного, то ест в року теперешнем, тисеча шестсот третем, на ден десятый мсца ноебра, на тые кгрунты звыш менованого именя нашого з их млстю велебным отцем Иоасафом, игуменом, и всею о Христе братиею капитулою манастыра Михайловского обе стороне выехали, приятелское померковане, згоду и статечное ростяте тых обудвух половиц наших, лугов, пожитков, в них будучих на часы вычние учинили таковым обычаем, иж што подданые наши указовали и менили быт именя нашому красноселскому от села Лысковского в кождом от чотырох островов, судерев, то ест меновите остров Лысковщину, на котором село Лысковци седят, и Тужир другий остров, в дереве бортном, в нивах пашных, в реках, речках, болотах, лузе, озерах ровно по половыцы и во всяких инших пожитках, выневши толко на сторону звечные наши бобровые гоны и берег реки Припети, до которых и предки и их млст сами // (арк. 460 зв.) ничого не мели. Противним зас обичаем именю их млсти велебного отца Иоасафа, игумена, и всее братии капитулы манастыра Золотоверхого церковному Лысковцов от села нашого Красноселя, остров Узлуже и Засторожече другий остров, также в дереве бортном, у нивах пашных, в реках, речках бололотах, лузе, озерах, сеножатех по половицы и во всяких инших пожитках, то мы признавши собе зобополне и злучивши вси островы заодно з обу сторон на узнане приятелское пустивши оные выш помененые островы, которых есмо межи собою непорядне уживали, островами межи себе есмо розобрали, а меновите островы два: Узлуже и Засторожече, яко се сами у собе здавна з веку мают зо всими землями бортними, з нивами пашными, проробками, з реками и реками, болотами, ловы зверинными и пташими, з перевесем и всякими иншими пожитками, яко перед тым подданые наши з поддаными церковными манастыра Золотовер. киевского уживали, и лугу половицу з озеры и речками, в ним лежачими, ловы рыбными и сеножатми от границы села Масанов, их млсти велебному отцу Иоасафу, игумену, и всей братиї капитуле манастыра светого Михайла церкви Золотоверхой киевской в моц держене и вечное уживане, ничого с тых вышпомененых островов и лугу и озер и пожитков в них тепер будучих и напотом чрез нашу сторону вынайденых на себе не оставуючи вічными часы, кром подданых, а гонов бобрових, пустилем и поступилем яко ж для помешки певные а неомылные знаки границ в лузе покул хто знал половицы кгрунтов своих уживати мает, через тых же зобополных, нижей помененых, приятелей наших починили, знаками рубежов в дереве и копцами землеными оточили есмо. А напервей над речкою // (арк. 461) Вязем на Пете первый копец засыпали и тны три у дубе натяли, от тоее Вязя речки через греду к глыбокому вертебу, тут другий копец коло дубов и тны три у вербе, у вербе з глыбокого вертебу в Перенобитку речку поперек речки, тут третий копец и тны три у вербе, и четвертый копец и тны три у вербе, с Перенобитки и озередищом, тут за озередищами пятый копец над долиною и тны три у дубе, тою долиною у Кривую долину за дорогу, тут, за тою дорогою, шостый копец усыпали и тны три у дубе зарубали, тою Кривою долиною у переволоку Осетрицкую, тут семый копец и тны три у дубе, тут же и осмый копец над тою Кривою долиною и тны три у дубе, оттол к вербю над рекою Припетю, тут великий копец нарожный и тны три у вербе, з вербыя у реку Припет, зоставуючи толко нам волный берег реки Припети на себе вічными часы Припетю рекою на низ до границы Масановское, яком сам держал и спокойне уживал. Также на другую сторону против тых островов островы два, Лысковщину и Тужир, яко се сами у собе мают з деревом бортным, з нивами пашными и проробками, з реками и речками, болотами, ловы зверинными и пташими, з перевелем и всякими иншими пожитками и половицу лугу з озери, в ним лежачими, и бобровыми гонами, и сеножатми от границы села Оревич их млст мне, Миколаеви Харлинскому, в моц, держене и уживане вічное, кром подданых и их маетности, которие яко их были и быти мают, пустит и поступит рачили. И так се то за узнанем приятелским на обе стороне сполное и вечистое померковане учинило и на вечные часы постановило и заварло, што собе на вси пришлые и вечные часы здержати, и на рочках близко пришлых кгродских киевских мсца декабра десятого дня, в сем року, шестсот третем, припадаючих признати // (арк. 461 зв.) и змоцнити маем и будем повинни, особливе то варуючи, если бы с которое колвек стороны мимо сее постановене наше, взрушаючи его, подданый который перешкоду якую в кгрунте, в дереве и пожитках яких колвек подданым другое стороны чинити мел, таковый кождый пну своему заруки коп двадцят, а стороне ображоной другую коп двадцят и вси шкоды нагородити мает. И сее постановене наше вечно и непорушно держано быти мает, и на то есми дал их млсти отцу игумену и всей братии о Христе капитуле манастыра Михайловского киевского сес мой лист под печатю моею и с подписом власное руки мене, Миколая Харлинского. До которого листу за устною прозбою моею их млст пнове приятеле и едначи наши зобополные, на той справе будучие, печати свои притиснути и руки свои подписати рачили, меновите его млст пн Ян Ондило Струкцас и дворенин его кр. млсти, его млст пан Миколай Воронецкий, его млст пан Давыд Солтан и возные енералные воеводства Киевского: Ян Соколовский, генерал; Александер Пирогович, енерал. Писан у Красноселю по нароженю Сна Бжого року тисеча шестсот третего, мсца ноебра, десятого дня”. У того листу печатей притиснених шест, а подпис рук тыми словы: “Mikołay Charlęzsky na Ostrohladowiczach, ręką swą; Iundziło Ian na Krzęmienicy, dworanin Strukcas jeo k. Mśći, ręką swą; Mikołay Woroniecky, ręką swą; печатар прошоный Давыд Солтан, рукою власною; Jan Sokołowsky, ienerał ziemie Kiowsky, ręką swą; Александер Пирогович, власною рукою”. Который же тот лист, доброволный запис, через его млст пна Харлинского признаный, до книг кгродских киевских от слова до слова ест уписан и сес выпис с печатми нашими отцу игумену и капитуле светого Михайла Золотоверхого ест выдан.
Писан у Киеве.
Андрей Сурин, писар кгродский киевский.
Корыкговано с книгами”.
ІР НБУВ, ф. 301, № 216 Г, по оп. 130, 2 арк. Оригінал.
ІР НБУВ, ф. 307, № 535/1763, арк. 460–461 зв. Копія.
1639 р., липня 1. Київ. – Випис з гродських книг Київського воєводства про судову справу ігумена Свято-Михайлівського Золотоверхого монастиря Філофея Кизаревича зі смоленським воєводичем Миколаєм Абрамовичем за право володіння островами Узліжжя і Засторожиче
“Выпис с книг кгродских воеводства Киевъского.
Року тисеча шестсот тридцят девятого, мсца июля, першого дня.
На рочках судових кгродъских киевъских от дня двадцят пятого, мсца мая, в року звыш написаном припалих и судовъне отправоват зачатих, перед нами, Яном Липъленъским, подвоеводим, а Теодором Гуменицъким, судьею, урядъниками судовыми кгродскими киевъскими, приточиласе справа з реестру судового за приволаньем возъного генерала, шляхетъного Себестияна Монъкошинъского, межы велебъным в Бозе отцем Филофеем Кизаровичом, игуменом монастыра святого Михайла Золотоверхого киевъского, и монастырей овъруцьких наместъника монастыра Печеръского киевъского, и капитулою законъниками монастыра светого Михайла поводами, а велъможъним его мл. паном Миколаем Абрамовичом, воеводичом смоленъским, чашъником Великого князъства Литовъского, позъваным, за позъвом кгродъским киевъским, од поводом попозъваних на рочъки нинешъние выданым, который за подънесенъем стороны поводовое у суду был читан и так се в собе мает: “Януш з Логойска Тышъкевич, воевода и енерал земл // (арк. 467) киевъских, житомирских, снятынъских староста, велъможъному его мл. пану Миколаеви Абрамовичови, воеводичови смоленъскому, чешъникови Великого князтва Литовъского, зо въсих добр в. мс. лежачих и рухомих из сум пнжних звирхностю его кр. мл., а владзою уряду моего воеводского приказую, абыс в.мс. передо мъною самим або судом моим кгродским киевъским на рочъках кгродских киевъских, которые в року теперешнем, тисеча шест сот тридцат девятом, мсця мая, двадцат пятого дня, припадут и на местцу звыкълом в замъку его кр. мл. киевъском сужони и отправованы быти мают, сам обличъне и завите, яко на року завитом стал на жалобу и правных поступок велебного в Бозе отца Филофея Кизаровича, игумена светого Михайла Золотоверхого киевъского и монастырей овъруцьких наместника монастира Печерского киевъского, и капитули законъников монастыра светого Михайла, которые в. мс. позывают о то, иж в року прошлом, тисеча шест сот третем, мсца ноябра, десятого дня, сталосе певное постановенье албо инътерциза межи его милости паном Миколаем Харлинским з одное сторони, а з другое стороны з велебным отцем Иосафом Мировъским, игуменом, и всею на он час капитулою монастыра светого Михайла Золотоверхого, таковым способом, иж што обедве стороне межи поддаными своими мели розные кривды зайстя от именей его мл. Пана Харлинского Красноселя а монастыра Михайловъского Лысковъцов // (арк. 467 зв.) в полъних кгрунътех, лузех и розъних пожитъках по половицы на обе стороне належачих а то для непорядъного, а сполъного уживаня, через приятел постановили и на сторону монастыра Михайловъского зосталисе, островы два, Узлужье и Застороженье, зо въсими их приналежъностями, а на сторону пана Миколая Харлинского зостали два островы: Лисковсчизна и Тужир зо въсими пожитъками и преналежъностями, якос в собе мают. Которые острови ограничившы, подданых зносит мели и особливими листами записалы, варовали под закладом в тих листах и той инътерцызе заложоной двемасти копами грошей. Если бы которая сторона досыт тойму чинити не хотела, яко ширей на той всей справе описано и доложоно ест, нижли в.мс. пане Миколаю Абрамовичу, набывшы тое маетности, от его мл. пана Харлинского, а будучи поссесором досыт тому постановеню инътерцызе к записом чинит не хочеш, але и овъшем умыслъне вытискаючи подданых лысковъцов с тых островов, шкоды немалые и грабежи чинит росказуеш, зачим водлуг листу запису и интерецызы в оклад (?) двох сот коп грошей попал. А так поводове в. мс. на термин выш означеный позивают, абы в. мс. стал, заруку двесте коп грошей заплатил и во всем се на жалобу поводов, што ширей чту права, на термине декларовано, будет усправедливил. Писан в замку киевском року тисеча шест сот тридцат девятого, мсца априля, второго дня. Войтех Рилский, писар”. А по прочитаню того позву сторона поводовая домавя // (арк. 468) ласе, абы позваному на тот позов справитсе наказано было. А потом сторони позваное пленипотент, показавшы пленипотенцыю автентычъную, с книг винятую, собе од принципала своего до бороненя справ даную и служачую, поведи, же тот пленипотент поводовое мниманое стороны, любо пленипотенцыю ручъную, собе теж належачую од принципалов своїх, якоби служачую продукует, поневаж не ест неоселым водлуг статуту и права, которое выразне опевает, же пленипотент тылко оселых за ручъною пленипотенциею мает быти до права припусчоных, ежели бы хотел якие справы автентов и то дедуковавшы вси бонифиция противко терминови форум акъторови и акъцыї, яко и в далшом прокгрессе правном вцале собе заховавъшы домивялъсе, абы суд того пленипотенъта водлуг права, яко неоселого до бороненя справы не припустивши далших поступок на поводовой стороне, то ест инъевазионе оную вздават допустил, а стороны поводовое пленипотент поведал, иж пленипотенция ест добрая, абовем под. печатью капитулъною с подъписом игуменъским наместниковым и инъших братьи с капитулы целнешых ест дана, што о виденътер верификовавъшы и пленипотенцыю ин медиум продуковавъши, просил аби суд позваному роспиратсе // (арк. 468 зв.) наказал суд нинешный кгродский киевский контроверсый сторон обох поводовое през пана Бенедыкта Пелъчицъкого а позваное през пана Матеуша Кгелбигута умоцованых их до суду нинешного вношоных выслухавши пленипотента поводовое сторони, то показаною пленипотенциею до бороненя справи припустивши, сторонам роспиратсе наказует, од которого декрету умоцованого позваного до суду головного трибуналу коронного любелского апеловал, суд ему тое апеляцыи допустивши, рок за него обом сторонам у менованого суду трибуналского в Люблине в тот час, кгды справы власного воеводства Киевского порядком инших коронних воеводств найпервей по дате декрету нинешнего и по вистю шести недел до суженя припадут и сужони будут ку росправе правной становитис зложил и нинешним декретом без припозву складает и назначает, протестовалсе актор о допусчене тое апеляцыї суд сере протестовал, же так правне быт розумел, што все для памети до книг нинешних кгродских киевъских ест записано. С которых и сес выпис под печатью кгродскою киевскою ест видан.
Писан у Киеве.
W niebytnośći jeo mśći pana pisarza grodskieo kiewskieo podpisali się
Piotr Bruchnewsky, нamiesnik zamku kiiowskiego.
Woyciech Rylski, woysky żytomirski, pisarz grodski kiiowski, m[anu]
p[ropria].
Корыкговал Чапчынский”.
ІР НБУВ, ф. ІІ, № 6872, 2 арк. Оригінал.
ІР НБУВ, ф. 307, № 535/1763, арк. 466 зв.–468 зв. Копія.
1643 р., листопада 10. [Київ]. – Випис з гродських книг Київського воєводства протестації ігумена Свято-Михайлівського Золотоверхого монастиря Філофея Кизаревича проти завданих кривд смоленським воєводичем Миколаєм Абрамовичем* на монастирському острові Узліжжя
// (арк. 469) “Выпис с книг кгродских воеводства Киевского.
Року тисеча шестсот четирдесят третего, мсца ноябра десятого дня.
На вряде кгродском в замку его кр. мл. киевъском передо мъною, Войтехом Енъдвовским, понамесъником замъку киевъского, постановивъшисе очевисто велебный в Бозе отец Анътоний Горъбачевский, намесъник монастыра светого Михайла Золотоверъхого, именем своим и велебного в Бозе отца Филатея Кизаревича, игумена михайловъского, и всее капитулы соленитер сведчил и протестовалсе напротив ко урожоному его мл. пану Макъсимилянови Брозовскому, подстолему киевъскому, добр Остроглядович и инъшых недавными юрисквезиторами чили дедичови о то, иж его мл. не дбаючи ничого на рикгор интеръцызы албо постановенья межи зошлым паном Миколаем Харлинским з одъное сторони, а з другое стороны Иосафом Мировским, на он час игуменом, и зо всею капитулою стого Михайла Золотоверхого сталое, которые аб утрин // (арк. 469 зв.) кве з выналезку приятелского постанове учинили были, абы в сполных кгрунътах, лузех и в врочисчас пожитках, по половицы на обедве стороны належачих, уживанье было, якож на он час в добрах Лисковцах монастырови Михайловскому зостали островы два: Узлужье и Застороженье зо всими приналежъностями, а на сторону пана Харълинъского зостали островы Лысковсчизна и Тужир с приналежъностями и абы жаден перешъкоди не чинил з обох сторон закълад двесте коп грошей листов межи себе заложили и инътеръцызами варовали, которому закладови в инътеръцызе заложоному, так прошлый велъможный его мл. пан Миколай Абрамович, на он час воеводич смоленъский, юрисквезитор от зошълого пана Харлинского розные кривъды в помененых островах чинил (шсчо его мл. инъститута акъцию) яко теж и его мл. пан подстолий в року теперешънем, тисеча шестсот чотырдесят третем, розных дней и мсцей перед греблю засыпал на острове монастырским Узлужью, озера власные на монастыр належачие половити казал, с пол и сеножатей, так монастырских, яко и подданых виолентер повыбиял, а потым на въласным кгрунъте, с которых выбил подле Красноселя, осадив слободу, назвисъком Туръжин назвал, през што так // (арк. 470) в закълад выражоный в записе анътецессоров своих попал, яко и до шкод протестуючих взглядом выбитя с помененых кгрунътов, которых потестуючих менит собе быт на десет тисечей золотых полъских кгрунъту в тое не инклюдуючи поднятых попал, о счо все именем выш помененого его мл. отца игумена капитулы и своим итерем аткве итерум протестовалсе, оферуючи помененого его мл. отца игумена и капитулы правъне о то з его мл. чинити. А на тот час просил, абы тая протестация до акът принята и записана, што и одеръжал. С которых и сес выпис под печатю кгродскою киевскою ест выдан.
Писан у Киеве”.
ІР НБУВ, ф. 307, № 535/1763, арк. 469 зв.–470. Копія.

*Змест самога дакумента паказвае, што пратэстацыя пададзеная не так супраць крыўдаў, раней учыненых панам М. Абрамовічам, як супраць злоўжыванняў новага ўладальніка Астраглядавічаў (г. зн. і Хвойнік) пана Максіміліяна Бразоўскага. (С. Б.)

Документальна спадщина Свято-Михайлівського Золотоверхого монастиря у Києві ХVІ–ХVІІІ ст. з фондів Національної бібліотеки України імені В.І. Вернадського. Зб. док. [Текст] / Автори-укладачі: Ю.А. Мицик, С.В. Сохань, Т.В. Міцан, І.Л. Синяк, Я.В. Затилюк; Нац. акад. наук України, Нац. б-ка України ім. В.І. Вернадського, Ін-т укр. археографії та джерелознавства ім. М.С. Грушевського. – К., 2011. – 559 с.: 31 іл.

Падрыхтаваў С. Бельскі

Вход на сайт
Поиск
Календарь
«  Март 2024  »
ПнВтСрЧтПтСбВс
    123
45678910
11121314151617
18192021222324
25262728293031
Друзья сайта
  • Официальный блог
  • Сообщество uCoz
  • FAQ по системе
  • Инструкции для uCoz
  • Copyright MyCorp © 2024