ДОКУМЕНТАЛЬНА СПАДЩИНА СВЯТО-МИХАЙЛІВСЬКОГО
ЗОЛОТОВЕРХОГО МОНАСТИРЯ У КИЄВІ ХVІ–ХVІІІ СТ.
З ФОНДІВ НАЦІОНАЛЬНОЇ БІБЛІОТЕКИ УКРАЇНИ
ІМЕНІ В.І. ВЕРНАДСЬКОГО
ЗБІРНИК ДОКУМЕНТІВ
Київ 2011
1550 р.,жовтня 24. Київ. – Скарга ігумена Свято-Михайлівського Золотоверхого монастиря Сави маршалку Миколаю Нарбуту на князя Дмитра Романовича Любецького за наїзд його підданих села Острогляди на монастирську землю
“Велможному пану гспдну и брату моему милому, пану Миколаю
Войтеховичу Нарбуту, маршалку гдрьскому, старосте мозырскому и кревскому, а дворянину гдрьскому пану Федору Тиши. Тых часов стояли передо мною очивисто. Жаловал за позвы моими игумен Свтго Михайла Золотоверхого Сава и вся // (арк. 442) братя чернцы того манастыря на кнзя Дмитрея Романовича Любецкого и кнгню его млсти жону Полозовну о том, иж люди его кузцовскии отнимают луг в людей их манастырских в лысковцов. В котором лугу всякии входы и пожитки им з людми его бывали и в том же лузе река, в которой бобровыи гоны, езы, дерево бортное, земля пашъная и сеножати, ловы звериныи и пташечъи и со всего того, поведа, людей их вон вытискают и там им входов мети не допущают, свиньи домовыи побили, жита потоптали и сена побрали и многии иншии кривды и шкоды починили. К тому теж люди кнзя Дмитреевы остроглядовцы в члвка их манастырского Ходоса в погонном острове вчале дубье бортное со бчолами отнимают, бчолы дерут и свои знамена новыи на дереве бортном кладут, а их стары казят и коли тыи люди манастырскии о тыи крывды и шкоды свои вряднику его жалуют, он их збивает, отповеди и похвалки чинит, а справедливости им николи с поддаными его учинити не хочет кнз Дмитрей за листом моцованым кнгни своее напротивку жалобы игумена михайловского отказ чинил тым, поведа, людем манастырским там в тот луг никоторого уступу не волно им там, яко езов бити, до реки ходати и бобровых гон гонити, земли похати, ани сеножатей косити, одно, дей, в том месте волно людем манастырским два озера, поле там з людми моими волочити, а инъших никоторых входов и пожитков им // (арк. 442 зв.) там нет. Где ж я, выслухавши жалобы игумена михайловского и с отказу кнзя Дмитреева и бачечи на то, же то есть реч земленая, которая тут жадного конца приняти не могла, не кончилом того права и казал им обеюм сторонам на землю выехати и судеи собе на то з обу сторон побрати. На што они обедве стороне призволили, яко ж игумен михайловский и чернцы, братя его, з свое руки судями взяли твою млст, пне староста, а пна Федора Тишу, а кнз Дмитрей так же на то з свое руки судями взял дворян гсдрских пна Криштофа Кмитича, а пна Федора Елца и рок певный завитый там выехати и судей своих вывести приняли по святе прошлом Велицедни, которое будет ув ындикте девятом у двух неделях, а так и я вшой млсти за то прошу и желаю, абы вша млст згодившися с тыми судями кнзя Дмитреевыми на тот луг и остров земли и сеножати, где ся игумену и чернцом кривда видит, выехали и того межи ними досмотрели и справедливост том водле обычая права статуту земского вчинили, а я о том до кнзя Дмитрея писал, жебы он на тот рок сам там выехал и судей своих вывел и твердости и доводы свои, которыи на тот луг и остров в себе мети будет, перед вами оказал и в том ся з ними росправил и праву был послушно во всем. Естли ж бы кнз Дмитрей сам там выехати и судей своїх вывести не хотел, вша бы млст предся з руки игумена михайловского судями, там выехавши на том року, яко на зави // (арк. 443) том своеи стороне выслухавши жалобы и доводу его справедливост и сказанье наконец въделали и в том ся справовали, ничим статуту земского не отступуючи и не откладаючи, болши того на иншии часы ести ж бы хто з вас з руки игуменовы судиею быти не мог, тогды он мает на то мети инъших судей собе побрати, которыї будут мети таковую ж моц судити и справовати, яко и вша млст, в сем моем листе описаный.
Писан у Киеве под лет Бож[ого] нарож[еня] 1550, мсца ок. 24 ден, индик[та] 9”.
ІР НБУВ, ф. 307, № 535/1763, арк. 442–443. Копія.
1555 р.,вересня 9. Київ. – Судовий лист Фенни Любецької-Полозівни про розмежування спірних лисковських ґрунтів з ігуменом Свято-Михайлівського Золотоверхого монастиря Симеоном
“Я, Фенна Дмитреевая Любецкого, Полозовна, явне чиню тым моим листом, кому будет потреб того выдати або чтучи его слышати, што отец игумен Семион Стго Михайла Золотоверхого бил чолом его млсти пану Григорью Ходкевичу, воеводе киевскому, о кривды людей своих церковных лысковских, которыи люди земли свої мают поспол судеревныи з людми кнзя, а малжонка моего кузцовскими, яко земли пашныи, бортныи, сеножати и всякие входы и пожитки с тыми людми ншми. Ино его млт пан воевода за прозбою и чолом битем его рачил ему тут на тые земли придати ему судями пна Богуша Дешковского, а пна // (арк. 443 зв.) Богдана Шавулу и кды тые суди выехали там на тые земли церковные на рок зложеный на ден Рожества Пречистое, ино я в небытности кнзя свого, кнзя Дмитрея Любецкого, на тот же зложеный рок там выехала и з руки своее судей своих вывела, пна Богухвала Павшу а пна Тихна Коркошку и кды ся тые суди нши з обу сторон выехали, люди церковные лысковские за листом его млт. пна воеводиным мне на люди мои ся жаловали о земли судеревные, яко бы им от людей моих кривда ся деяла в земли пашной, бортной и сеножатех и во всяких уходех и пожиткох. И тые суди, слухавши жалобы людей церковних, пытали: “Чи поспол вам тые земли пашные и бортные и сеножати з людми кнзя Дмитреевыми?” И люди церковне, так теж и люди мои кузцолские то з обу сторон вызнали, иж им всякая реч посполитая по половине, и тые суди нши так нашли, иж кождый члк свои входы, дерево бортное, зличити мает и под ким што болше будет, тот мает оповедати под присегою, а што ся дотычет земли пашне, хто мает ниву пашную, тот сябру своему мает дати против тое нивы толко ж тертежу, а под ким дерева бортного болшей, тот против того сябру своему мает дати дерева углядя и подтеребов и кремного и в долобов, иж бы ему также против того ся наполнило. А што ся тыче яко сеножатей и ловушок рыбных, што в лузе яко ся их млсть записали, то мают держати водле записов своих перших, яко и // (арк. 444) перед тым, кром озер, што неводы ходет, а о иншие всякие справы мужицкие. Я, жена Дмитреевая Полозовна, и отец игумен Семион справедливост есмо на обедве стороне вчинили, а которая бы сторона нарушила тую вгоду ншу, тот мает заплатит сторона стороне петдесят коп грошей, а если бы который члк наш з обу сторон то нарушил, таковый мает заплатити пану своему вины дванадцат коп грошей. И тому есмо делу межи подданих нших рок зложили ден стго Дмитрея, который ма быт в року пятсот пятдесят пятом и на то есми отцу игумену Семиону дала сей мой лист под печатю моею, и под печатми судей моих, пна Богухвала Павши а пна Тихна Коркошки.
Писан лет. Бож.1555, мсца сеп. 9 ден.”.
ІР НБУВ, ф. 307, № 535/1763, арк. 443–444. Копія
1556 р., грудня 19. Київ. – Випис з судових книг київського воєводи Григорія Олександровича Ходкевича про позов ігумена Свято-Михайлівського Золотоверхого монастиря Симеона князю Димитрію Романовичу Любецькому за ґвалтівний наїзд на село Лисковці
// (арк. 445 зв.) “Выпис с книг суда его млсти пна Григоря Александрович Ходковича, воеводы киевского, подкоморего гсдрского, державци кормяловского, под лет Божя нарож. 1556, мсца декабря, 19 день.
Што позывал позвы перед пана его млсть игумен монастиря свтого Михайла церкви Золотоверхое Семион кнзя Дмитрея Романовича Любецкого о кгвалтовное наслане и пожате збожя в року пятдесят четвертом на земли церквъной села Лысковского и к тому теж позвал был на том же позве, иж в року пятдесят пятом перед Божим нароженем люди кнзя Дмитреевы села Остроглядовского, вшодши в землю лысковскую тридцятеро бчол з дерева бортного выдрали и тыиж, дей, люди остроглядовские невинне копу собравши, на оной копе людей церковных лысковских обухи позбивали и помордовали. Ино кнз Дмитрей, будучи припозван перед его млстю паном очивисте з игуменом ставши, на то повiдил тым обичаем, што, дей, ожаловал мене отец игумен, абых я наслал людей своих на землю их а збоже кгвалтовне пожати козати мел, тогм, дей, николи церкви Божей а людем их церковным не чинил. А што ся, дей, дотычет жалобы отца игуменови на людей моих села Остроглядовского о подране бчол и о збите людей манастырских тое село Остроглядовичи не ест у повете Киевского воеводства, але Троцкого повету*, не повинен бых тут с того именя отказывати, а иж игумен таковыи кривды подданым монастырским от людей моих менит быти, нижли николи в мене о тые вси жалобы на людей // (арк. 446) моих не жаловал справедливости не просил, и я, дей, теж сам и люди мои кузцовские и хвойницкие от подданых церковных так веле кривды нам, а так и тепер я на поданых моих яко о пожати збожя и подранье бчол и збите людей и о иншие вси крив[ды] черес право людем их монастырским там на одно местцо зъехавшися, право дам и справедливост вчиню, также бы ми игумен нехай о кривды людем моим поделаные на подданых монастырских право дал и справедливост вчинил игумен тут же перед паном его млсти стоячи, кнзю Дмитрею и людем его на людей монастырских справедливост уделати через право обецал. И зложили на то собе рок рожества Пречистое Бци свято напред пришлое, в року пятдесят семом, и просили пана его млст о вижа ку пригляданю оных прав, его млст панпридал им на то вижом наместника своего завского Ивана Колонтая. И то для памети его млст пан у книги свои записати козати рачил, на што и выпис с книг под печатю его млти панскою игумену михайловскому отцу Семиону ест дан.
Писан в Киеве”.
ІР НБУВ, ф. 301, № 216 Г, по оп. № 165, 2 арк. Оригінал. ІР НБУВ, ф. 307, № 535/1763, арк. 445 зв.–446. Копія.
*Князь Дз. Любецкі, пэўна, спадзяваўся на геаграфічную непісьменнасць кіеўскіх урадоўцаў, каб не адказваць за дзеянні часткі сваіх падданых. Хвойніцкіх людзей, як нібыта пацярпелых у канфлікце з царкоўнымі, прызнаў, а вінаватых астраглядаўскіх паспрабаваў прыкрыць. Хвойнікі, аднак, значна далей ад Лыскаўшчыны і Пагоннага, чым Астрагляды. Іншая справа сяло Кузцоўскае (будучае Краснаселле). (С. Бельскі)

1556 р., грудня 19. Київ. – Випис з судових книг київського воєводи Григорія Олександровича Ходкевича про розгляд справи щодо відмови від озера Подворне в селі Лисковці на користь Свято-Михайлівського Золотоверхого монастиря між ігуменом Симеоном і князем Димитрієм Романовичем Любецьким
“Выпис с книг суда его млсти пана Григоря Александрович Ходковича, воеводы киевского, подкоморего гсдрского, державцы кормаловского, под лет Бож. нарож. 1556, мсца дек. 19 дня
Пан его млст того дела смотрети рачил, а при его млсти на тот час были посол его кролевскей млсти великий ордынский, кнз Андрей Семенович Одинцевича, а городничий киевский пан Александро Дмитрович жаловал за позвы своими игумен манастыря святого архангела Михайла церкви Золотоверхое Семион со всею братею чернцы того манастыря на дворянина гсдрского кнзя Дмитрея Романовича Любецкого о том, што ж, дей, он в луг посполитый наш и людей наших манастырских селца Лысковского, где здавна оные люди наши и мы сами вход мевали, а тепер там в тот луг вжитку жадного тым подданым ншим манастырским и нам самим мети не допущает, а озеро, дей, ншо церковное того ж селца Лысковского на ймя Поддворное мочно кгвалтом за себе забравши, зволочити казал, до которого, дей, озера его млст сам, а не предки его от давных чсов уступу никотрого не мевали. Княз Дмитрей тот жо, стоячи перед паном его млстю очивисто, оказ на то чинил тым обычаем, што ся, дей, дотычет лугу посполитого вашего манастырского и в нем вжитку всякого в дереве бортном, в сеножатех, у криницах людей ваших лысковских з людми моими и жоны моее кнгни Фенны Полозовны села ншго Кузцовского того, дей, сам и жона моя и люди нши вам самым и людям вашым во всем входу мети по поло // (арк. 447) вине с тыми людми ншми кузцовскими не забороняем и заборонят не хочем; нехай там в том лузе тые люди ваши всего наполы з людми нашими вечне уживают, яко есмо ся и перво сего с предком твоим, игуменом того манастыря Ионою, перед судями ншими выслаными там на тот луг от воеводы киевского его млсти небощика кнзя Фредриха Глебовича Пронского, паном Федором Елцом, а паном Солтаном Стецковичом, а с стороны манастырское служебниками его млсти пана воеводиными, паном Федором Тишою, а Григорем Василевичом в том едналным обычаем записали того ничим нарушати не хочем, одно што ся дотычет в том лузе гонов бобровых в реце езов, луки, осетрее озера, во лугова, аустетини (?) в твое ся вам и людям вашим не вступати, а озеро, которое называется Поддворное, ач в том там листе ншом на ймя не описано, але иж ся так упираете, жебы было церковное, хотя ж то достаточне вiм, иж тест мой небощик, пан Полоз, того озера во вживани был. Мы и того озера церкви Божей к манастырю святого Михайла поступуем и в то ся я сам, жона моя и дети вечне уступовати не хочем, так теж и игумен з братею чернцами перед его млстю паном гонов бобровых в том лузе, езов по реце, луки, осетрее озера, во лугова вырен в том вжитку никоторого собе на манастыр и людям своим лысковским не мети ведля описаня предка своего Ионы игумена, яко то и на листе от кнзя Дмитрея // (арк. 447 зв.) и от кнгни Фенни, малжонки его, к манастырю даном игумен перед паном его млстю описано показал. А так пан его млст с обу сторон выслухавши межи ними тых тих речей, яко ся то пред его млстю точили, рачил то для памяти у книги свои казати записати, на што и выпис с книг игумену Семиону и брати чернъцом у манастыр святого Михайла к церкви Золотоверхой под печатю его млсти панскою ест.
Дан писан у Киеве”.
ІР НБУВ, ф. 307, № 535/1763, арк. 446–447 зв. Копія.
1569р., березня 1. Люблін. – Лист Сигізмунда ІІ Августа Щасному Харлинському із забороною чинити кривду в лисковських землях Свято-Михайлівського Золотоверхого монастиря
“Жикгимонт Август, Божю млстию корол полский, руский, пруский, жомътский, мазовецкий.
Дворанину нашому Щасному Харлинскому. Жаловал нам игумен со всею братею чернцами манастыря светого Михайла Золотоверхого с Киева о том, што ж, дей, ты именя их манастырскому на ймя Лысковцов в зобраню кгрунту того именя их властивого в побраню без винности яловиц, баранов, гусей, кур и инших реч в подданых их того ж меня сам кривдиш, ураднику слугам и подданым своїм хабенским тому именю и подданым их кривды и шкоды чинити допущаеш и великий им утиск чиниш, в чом они собе от тебе, от врядника, слуг и подданых // (арк. 448) твоих хабенских кривды и шкоды немалые быти поведают, и били нам чолом, абыхмо им таких кривд и шкод безвинных от тебе, врядника, слуг и подданых твоих хабенских терпети не допущали и през лист наш тебе навпоменули. Прото будет ли так, яко они нам жаловали невдячне то от тебе приймуем, навпоминаем и приказуем тобе, абы еси будет ли што того кгрунту их за себе забрал им в целости отдал и к тому именю их засе привернул, а враднику, слугам и подданым своим хабенским тые вси грабежи яловицы, бараны, гуси, куры отдати и поворочат, албо за то поплатити казал. А гдебы того поворочат або поплатит не хотели и ку тому бы ся не знали, ты бы з них игумену и чернцом того манастыра справедливост слушную без отволоки учинил и болше того безправне кгрунту их не забирал, врадовнику, слугам и подданым своїм забирати и таковых невинных грабежов подданым их чинити не казал, а было л бы тобе до них якое дело, ты ся з ними правом ся обыходил конечно.
Писан у Люблине лета Божего нароженя тисеча пятсот шестдесят девятого, мсця марца, первого дня.
Лаврин Война, подскарбий и писар”.
ІР НБУВ, ф. 307, № 535/1763, арк. 447–448 зв. Копія.
1602 р., серпня 15. Київ. – Випис з гродських книг Київського воєводства свідчення возного Станіслава Карського в справі Миколи Харлинського та ігумена Свято-Михайлівського Золотоверхого монастиря Йосифа Мировського про розмежування озер Подворне й Остриця
// (арк. 448 зв.) “Выпис с книг кгродских воеводства Киевского.
Лета Божего нароженья тисяча шест сот второго, мсца авъгуста, петнадцатого дня.
Пришедши до враду его кр. мл. кгродского киевского до мене, Станислава Викгуры, на сес час будучого на местцу урядовым у Киеве, от его мл. пна Вацлава Вилгорского, подвоеводзего киевъского, велебный в Бозе отец Иоасахв Мировский, игумен манастыра киевского светого Михайла аргангела церкви Золотоверхое сам от себе и именем всих еже о Христе братии чернъцов капитули помененого манастыра Михаловского, так яко и первей сего, августа третего дня, жаловал и оповедал на его мил. пна Миколая Харлинского, подкоморича киевского, о том, иж пропомневши постановеня его мл. Небожчика пна подкоморего киевского, пна отца свого, и вины межи нами сто коп положеное року тепер идучого, тисеча шестсот второго, мсца августа, первого дня за росказанем и ведомостю его мл. пна Миколая Харлинъского наехавши моцно кгвалтом врадник остроглядовский на йме Войтех Кгромадцкий з ыншими слугами и поддаными его мл., так остроглядовскими, яко и красноселскими, которых всих слуг и подданых своих его мл. сам лепей знает и именя их ведант, кгвалтовне озеро наше власное манастырское церкви Светого Михайла Золотоверхой киевской, здавна служачое, меновите прозываемое Подворное и озеро другое з его мл. нам, манастыру Михайловскому по лету служачое, прозываемое Осетрыца, которые на сес рок власне нам, на манастыр Михайловский прихо // (арк. 449) дило, поволочил, которы же то врадник з слугами и с поддаными его мл. пна Миколая Харлинъского з волею и ведомостю его мл. кгвалтовне помененые озера нам, манастыру Михайловскому служачие лысковские, поволочил и волочит, шкоду нимилую учинил и чинит и спокойного стародавного нашого уживанья оных озер наших церковных в кгрунте сполно з его млтю нашом кгвалтовне и безправне выбил и выбивает, за которым выбитем спокойного держаня к уживаню и поволоченя и половеня в оных озерах нам, манастыру Михайловскому киевскому, належачих шкодуем, дей, собе от его млти сто коп гршей и просил мя, ураду, его мл. отец игумен михайловский, от себе и именем всих еже о Христе братии манастыра Михайловского о возного нашого леда не оного кгвалтовного озер поволоченья и половеня рыб, я его млсти на то енерала возного земли Киевское шляхетного Станислава Карского придал, который енерал возный там бывши и пришедши на врад, до книг кгродских киевских в року теперешнем тисеча шестсот втором, мсца августа, пятогонадцат дня квит сознаня своего под печатю и с подписом руки своее тыми словы подал: “Я, Станислав Карский, енерал возный земли Киевское, сознавам на сем квите моем, иж будучи мне прыданым на потребы его милости отъца Иосахва Мировского, игумена манастыра киевъского светого Михайла архангела церкви Золотоверхое и всей еже Христе брати капитуле помененого манастыра Михайловского, яко ж року тепер идучого шестсот второго, мсца августа, семого дня, был есми во йменью их млсти в селе Лысковцах и там же под селом Красноселским за оказанем атамана // (арк. 449 зв.) их мл. лысковского на мя Дронка Калениковича и инших подданых их мл. лысковских видел есми озеро зволоченое подле Припети уступное, прозываемое Осетрица, зволоченя тут же на березе того озера знаки сохи, што сети висили, луски и слену немало, што там же и рыба чинена, а в другое озеро, прозываемое Подворное подворнуем (?) красноселским знаки ест, жело власне и жаки под тим озером стоят, которыми в том же озере рыбы ловят, и оповедали предо мною, возъным, тот атаман лысковъский Дронъко и вси подданые лысковъские, иж, дей, пне возный тые озера кгвалтовне зволечены и волочат урадник остроглядовский Вотех Кгромацкий от его мл. пна Миколая Харлинского через иншии слуги и подданые и входники свои. А так я, возный, што и видел, и в поведаню от них слышал, то на сем квите моем ку записаню до книг кгродских киевъских его млости отъцу Иосахву Мировскому, игумену светого Михайла церкви Золотоверхое киевъскому, и капитуле того ж манастыра Михайловского дал есми, которое ж то сознане возного до книг кгродских киевских ест записано, с которых и сес выпис под моею печатю на то ест выдан.
Писан у Киеве.
Андрей Сурин писар кгродский киевский.
В небытности на тот час у Киеве его млсти пна Андрея Сурина,
кгродского киевского писара, Иван Высоцкий, подпис.
Корикгован с книгами”.
ІР НБУВ, ф. 307, № 535/1763, арк. 449–449 зв. Копія.
1603 р., жовтня 20. Київ. – Випис з гродських книг Київського воєводства свідчення возного Олександра Пироговича в справі Миколи Харлинського та ігумена Свято-Михайлівського Золотоверхого монастиря Йосифа Мировського про розмежування озер Подворне й Остриця
“Выпис с книг кгродских воеводства Киевского.
Лета Божого нарожения тисеча шестсот третего, мсца октебра, двадцатого дня.
На рочкох судових кгродских киевских, которые от дня пятогонадцат мсца октебра, в року теперешнем тисеча шестсот третем припали и судовне отправоватисе зачали, перед нами Вацславом Вилгорским, подвоеводим, а Филоном Стрыбылем, чашником его кр. млсти и судею, врядниками судовыми кгродскими воеводства Киевского, ставши очевиста возный енералный Александер Пирогович ку записаню книг кгродских киевских через квит свой сознане учинил, в тые слова: “Я, Александер Пирогович, енералный возный земли Киевское, сознаваю тым моим квитом, иж року тепер идучого тисеча шестсот третего, мсца августа, второго дня от него и положил есми позов кгродский киевский в ыменю и дворцу его млсти пна Миколая Харлинского Красноселю, который позов увотугнувши у двери сененные в том двору, дворни само и челяди в том дворцу будучой оказалем, в жалебе // (арк. 451 зв.) в Бозе велебного отца Иосафа Мировского, игумена и капитулы манастыра светого Михайла Золотоверхого киевского, по его млсти пна Миколая Харлинского выданый. А то о кгвалтовное выбите спокойного держаня з луга сполного манастыру Михайловскому от именя их Лысковского и Лучичов з ыменем его млсти п. Харлинского Кузницовцами, новопрозываемым Красноселем, из озер, прозываемых Подворного и Осетрицы и теж о нестане, яко на завитом року на грунте преречоным лысковским и красноселским и нечинене досит ведле розейму на местцу певном у озера манастырского Подворного о заруки и шкоды за тым походячие, яко жалоба и вся справа на том позве описана и достаточне доложена и рок ку праву на рочки пришлые кгродские киевские дня п’ятнадцятого, мсца октебра, в року теперешнем тисеча шестсот третем становитисе зложон ест и того положена позву ку записаню до книг кгродских киевских далем сес квит с печатю моею и с подписом руки”. Писан у Киеве року тисеча шестсот третего, мсца октебра, шестогонадцат дня. Которое ж то очевистое возного на квите с печатю и с подписом руки его поданое сознане до книг кгродских киевских ест уписано, и сес выпис под нашими печатми отцу игумену и чернцом ест выдан.
Писан у Киеве”.
ІР НБУВ, ф. 307, № 535/1763, арк. 451–451 зв. Копія.

1603 р., грудня 20. Київ. – Випис з гродських книг Київського воєводства мирової угоди від 10 листопада 1603 р. між Миколою Харлинським та ігуменом Свято-Михайлівського Золотоверхого монастиря Йосифом Мировським про розмежування лисковських та красносільських земель
“Выпис с книг кгродских воеводства Киевского.
Лета от нарожения Сна Бжого тисеча шестсот третего, мсца декабра, двадцатого дня.
На рочках судовых кгродских киевских, которые от дня десятого мсца декабра в сем року, тисеча шестсот третем, припали и судовне отправоватисе зачали, перед нами, Вацславом Вилгорским, подвоеводим, а Филоном Стрыбылем, чашником его кр. млсти и судею, врадниками судовыми кгродскими киевскими, постановившисе очевисто в Бзе велебный его млст отец Иосаф Мировский, игумен манастыра светого Михайла Золотоверхого Киевский, з одное, а его млст пан Миколай Харлинский з другое сторони, устне и доброволне ку записаню до книг кгродских киевских подали лист постановеня своего, межи ними даного и на обе стороне служа // (арк. 458) чого под печатми и с подписами рук своих и инших людей зацных, приятелей своих оных, упрошоных на справе, нижей помененой, будучих просечи, абы был принят и до книг кгродских киевских уписан. Которого мы огледевши и читаного вислухавши, приняли и до книг кгродских киевских уписати казали. Который слово от слова так се в собе мает: “Сталосе ест певное а неотменное постановене межи нами, Миколаем Харлинским, з одное, а отцем Иосафом Мировским, игуменом, и всею капитулою манастыра светого Михайла Золотоверхого з другое стороны, таковым способом, иж што мы обоя сторони межи поддаными своими мели розные кривды, застя и розницы, от именей своих пна Харлинского Красноселя, а манастыра Михайловского Лысковцов в сполных кгрунтех, лузех и розных пожиткох по половицы на обе сторене належачих, а то для непорядного а сполного уживаня нашого, отколи и затяги правные за позвы манастырскими межи собою есмо мели, тогды за зложенем згодным року и местца, то ест дня нинешнего мсца ноебра десятого, в сем року тисеча шестсот третем, на местцах розних станувши, через приятел своих зобополных згоду и поровнане в кгрунтех, лузех, озерах и иных всих пожиткох суметных учинили, и межи себе островами землю для помешки розобрали, знаки певные способом границ водою и суходолом положили, а меновите на сторону отца игумена и капитулы манастыра Михайловского Золотоверхого киевского засталисе островы два, Узлуже и Засторожече, зо всими их приналежностями, а на сторону зас его млсти пна Мико // (арк. 458 зв.) лая Харлинского зосталисе два островы, Лысковщина и Тужир, теж зо всими пожитками и приналежностями, яко се в собе мают одному от другого обрубом, яко о том достаточне листы, записы на обе стороне даные в собо обмовляют. А иж подданые обу двух сторон тых именей розно и непорядно, яко Кузцовцы або Красноселцы, так Лысковци и Лучичи седели, тогды за згодным теперешним постановенем нашим собе обовезуемсе тых подданых кождая з нас сторона на свой островы перенести, то ест я, игумен, и капитула село Лысковцов и Лучичов з острова Лысковщини и Тужера на Узлуже або Засторожече. А его млст пн Харлинский з острова Узлужа и Засторожечя дворец свой и село Красноселе на Лысковщину и Тужир певного часу скоро, даст Бог, зима зыйдет навесне в року пришлом, тисеча шестсот четвертом, з домами и зо всим будованем без всякого омешканя так, якобы се одному другого островех ничого перешкоди не зоставало, и што кому в его островех в обрубе пожитков пришло, тот мает в своей власности пожитков своих уживати, а в речках, болотех и иных живцах, которые тых островов делят, подданые обеюх сторон заровно уживати мают, варуючи того, иж если бы которая колвек з нас сторона тому постановеню досит учинит не хотела, подданых не знесла, албо постановене нарушила, тогды за припозванем перед кождым судом кгродским, земским и трыбуналским, бы и неналежным, не заживаючи жадных зволок и оборон правных и неправных скутечне усправедливитися закладу коп двесте // (арк. 459) грошей литовских и вшелякие шкоды затым поднятые укривжоному упорный и не чинячий досит сему постановеню нашому, заплатити и нагородити мает и будет повинен. А по заплаченю пред се сему постановеню нашому досит во всем чинити маем и будем повинни, яко ж и судови кождому и неналежному моц и належност суду в той справе сим записом даем и обовезуем аж до скутечного досит учиненю одному от другого обоях сторон, што все собе здержати под вышречоными обов’язки, обовезуючи на змоцнене тоее речи, сее постановене под печатми и с подписом рук своих, так же с печатми и с подписом рук еднако ж на той справе будучих, от нас устне прошених, нижей помененых особ их млсти, его млсти пна Яна Сондила Струкцаса, и дворенина его р. млсти, а пна Миколая Воронецкого, пна Двда Солтана ку записаню до книг есмо дали. Писан у Красноселю, року тисеча шестсот третего, мсца ноебра десятого дня”. У того листу печатей притиснених пят, а подпис рук тыми словы: “Иоасаф Мировский, игумен михайловский золотоверхий киевский, рукою власною; Mikołay Charlęsky na Оstrohladowiczach, ręką swą; Iundziło Ian na Krzeminicy, ręką swą; Mikołay Woroniecky, ręką swą;. Davyd Soltan, ręką swą”. Который же лист признаня их млсти у суду принятый с початку аж до конца до книг кгродских ест уписан и сес выпис с печатми нашими отцу игумену и капитуле ест выдан.
Писан у Киеве.
Андрей Сурин, писар кгродский киевский.
Корыкговано с книгами”.
ІР НБУВ, ф. 301, № 216 Г, по оп. 130, 2 арк. Оригінал.
ІР НБУВ, ф. 307, № 535/1763, арк. 460–461 зв. Копія.

Далей